ភ្នំពេញ៖ ផ្លូវល្បឿនលឿនភ្នំពេញ-បាវិត នឹងត្រូវបើកការដ្ឋានសាងសង់ជាផ្លូវការ នៅថ្ងៃទី៧ ខែមិថុនា ឆ្នាំ២០២៣ ក្រោមអធិបតីភាពរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា។

រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានបញ្ជាក់បែបនេះក្នុងឱកាសពិធីសម្ពោធបើកឱ្យប្រើប្រាស់ជាផ្លូវការមណ្ឌលត្រួតពិនិត្យ លក្ខណៈបច្ចេកទេស (ឆៀក) យានយន្ត សាខាសំរោងអណ្តែត នៅថ្ងៃទី ២១ ខែមេសា ឆ្នាំ២០២៣។

ផ្លូវល្បឿនលឿនភ្នំពេញ-បាវិត ជាផ្លូវល្បឿនលឿនទី២ នៅកម្ពុជាដែលមានប្រវែង ១៣៥គីឡូម៉ែត្រ ដោយគ្រោងត្រៀមចំណាយថវិកាជាង ២ពាន់លានដុល្លារអាមេរិក គ្រោងនឹងបញ្ចប់ការសាងសង់នៅចុងឆ្នាំ២០២៦ ឬដើមឆ្នាំ២០២៧។

ផ្លូវល្បឿនលឿនភ្នំពេញ-បាវិត ឆ្លងកាត់ខេត្តកណ្តាល ព្រៃវែង និងស្វាយរៀង ដែលផ្លូវល្បឿនលឿនមួយនេះនឹងផ្តល់ប្រយោជន៍ដល់ពលរដ្ឋ ជាពិសេសពង្រីកទំហំពាណិជ្ជកម្ម និងដឹកជញ្ជូនរវាងប្រទេសកម្ពុជា និងប្រទេសជិតខាង។

គួរឱ្យដឹងដែរថា ក្រៅពីគម្រោងសាងសង់ផ្លូវល្បឿនលឿនភ្នំពេញ-បាវិត ក្រសួងសាធារណការក៏មានគម្រោងផ្សេងៗទៀតផងដែរ ក្នុងនោះមានគម្រោងសាងសង់រថភ្លើងក្រោមដីនៅរាជធានីភ្នំពេញ គម្រោងធ្វើទំនើបកម្មផ្លូវរថភ្លើងដែលមានស្រាប់ឱ្យទៅជាផ្លូវរថភ្លើងល្បឿនលឿន ព្រមទាំងគម្រោងពង្រីកការដឹកជញ្ជូនផ្លូវទឹកតាមទន្លបាសាក់ជាដើម៕